Дали е ова рај сместен во дом од 41 квадрат: Трикот е во едноставноста и комбинација на боите
Иако има само 41 квадратен метар, овој мал стан изненадува со комфорен дневен престој и посебна спална соба.
Белите ѕидови и лесниот, преклопен мебел го прават просторот визуелно поголем и попростран.
Станот е уреден со многу љубов и внимание кон деталите, а за неговиот уникатен изглед заслужни се дизајнерот на ентериер и мајсторот за дрводелство Рајан Вајлдинг и неговата партнерка, Агата Пискунович. Покрај професионалните вештини, двајцата внеле личен печат и естетика што го прави домот топол и пријатен.
Живеат во приземје со два влеза, а започнале со едноставен бел ентериер кој со текот на времето добил повеќе карактер и боја. Агата се погрижила за деталите и нијансите што внесуваат живост, а Рајан со својата мајсторска рака создал практични полици, фиоки и клупи што совршено го искористуваат секој агол.
Еден од неговите најпаметни изуми е дрвената конструкција околу прозорците, која решава повеќе функционални предизвици одеднаш. Освен што создава полица за колекцијата орхидеи, додава и простор за складирање. Клизните панели од двете страни се инспирирани од традиционалната јапонска архитектура шои, завршени со слој од оризова хартија.
Посебно иновативно е и решението со ролетните кои целосно се вовлекуваат во плафонските рамки, така што не го блокираат природното светло. Работната маса во аголот се преклопува кога не се користи, а кога е отворена, обезбедува доволно простор за работа.
Наместо класична трпезарија, Вајлдинг изработил две споени маси со крила што се преклопуваат под кујнскиот остров. Кога се расклопени, формираат голема површина за оброк за шестмина гости. Мат црната конструкција е во контраст со подовите од бел даб и светлите нијанси на вратите и полиците.
Во целиот стан доминира белата боја, а боите се внесени преку уметнички дела и декорации – меѓу нив и платната на самата Агата. Над креветот во спалната соба стои нејзина фотографија во апстрактен стил, а во дневниот престој голема слика во розова нијанса поставува ведар тон на просторот.
Резултатот е мал, но прекрасно функционален стан исполнет со боја, топлина и креативност, кој докажува дека и 41 квадрат може да биде дом со голема душа.
Извор / Фото извор: Youtube / CBC
