Скопје во драма на ѓубрето: Град без систем, без ред и без минимум чувство на срам
Ова што се случува со Скопје веќе не е ни срамота – ова е деградација. Главниот град на државата денес личи на град без систем, без ред и без минимум чувство на срам. Ѓубре на секој чекор, преполни контејнери, расфрлани кеси и неподнослива миризба која станува секојдневие за скопјани.
Секој ден стануваме со истата слика – преполни контејнери, расфрлани кеси, остатоци од храна и неподнослива миризба што ја обвива секоја улица. Ова не е периферија, ова е центарот на главниот град. Град кој некогаш сакаше да личи на европска метропола, а денес личи на депонија без управител.
Граѓаните редовно плаќаат за услуга која одамна не функционира, а институциите се натпреваруваат во префрлање вина. Едни тврдат дека нема камиони, други дека нема работници, трети дека протестите се причина за застој – но резултатот е секојдневна слика на град во кој хигиената е заборавен поим.
Во меѓувреме, никој не чувствува одговорност. Вработените во „Комунална хигиена“ бараат решенија и редовни плати, градската власт молчи, а Министерството најавува „вонредни контроли“. Додека сите ветуваат „брзи мерки“, ние живееме во реалност каде сметот станува дел од пејзажот.
Скопје заслужува повеќе. Градот во кој растат нашите деца не смее да биде град што смрди, каде тротоарите се пренатрупани со отпад, а воздухот тежи од нечистотија.
Ова не е само прашање на естетика, туку на достоинство.
Градот не може да се нарече модерен ако не може да биде – чист.
А додека одговорните се преправаат дека не гледаат, ѓубрето ќе продолжи да зборува наместо нив.
Ирена Ставрова/Фото: Женски магазин
