Овој македонски град стана сериозна конкуренција на европските метрополи со новогодишната декорација (ФОТО)
Штип го најави почетокот на празничната сезона – улиците, плоштадот и главните пешачки зони на градот се украсени со новогодишни светилки, декоративни фигури и елки што внесуваат топлина и празничен дух. Со првото вклучување на светилките, градот доби сосема нов изглед, подготвен да ги пречека празниците.
Македонските градови полека го добиваат новогодишниот сјај, но Штип меѓу првите го облече своето празнично руво. Централниот плоштад блеска со богата светлосна декорација, а главната новогодишна елка – украсена со стотици светилки – стана омилена локација за фотографии. Граѓаните, особено најмладите, секоја вечер се собираат да го почувствуваат празничниот амбиент.
Во голем дел од Балканот и Европа, градовите веќе се подготвени за празниците, со божиќни базари, гастрономски понуди и атракции кои во последните години станаа магнет за туристи од целиот свет. Традиционалните европски божиќни пазари веќе одамна се препознатлив бренд, развивајќи силен празничен туризам што привлекува милиони посетители што сакаат да уживаат во зимска магија, локални специјалитети и занаетчиски украси.
Иако Македонија се уште го гради овој концепт, градовите секоја година сè повеќе вложуваат во новогодишна декорација. Штип покажува дека и локалните центри можат да изгледаат модерно, топло и празнично – токму онака како што му доликува на овој период од годината.
Граѓаните очекуваат дека празничната програма, која традиционално вклучува концерти, хуманитарни настани и детски активности, ќе донесе дополнителна живост и радост. За многумина, украсениот град претставува почеток на она што сите го посакуваат – мирни празнични денови, семејни собири и оптимизам за новата година.
РЖМ - Г.Д.Г
Фото: Фејсбук
