„Среќен како Наи“ од Ана Салџиева – нова инклузивна сликовница исполнета со радост, љубопитност и љубов
Новата сликовница „Среќен како Наи“, од авторката Ана Салџиева со илустрации на Томи Џуровски, неодамна излезе од печат во издание на „Либи“, дел од „Арс Ламина – публикации“. Станува збор за инклузивна сликовница, која нè води низ светот на едно дете родено со физичка разлика – limb difference – и ни покажува дека неговото секојдневие е полно со радост, игра и љубопитност, исто како кај секое друго дете.
Преку топли и инспиративни сцени, книгата ја слави детската сила, уникатност и способноста да се живее со полно срце, без ограничувања.
- Приказната за Наи е длабоко лична и произлезе од моето мајчинство. Таа е инспирирана од мојот син Јан, кој е роден со конгенитална хипоплазија на рака. Заедно со неговата сестра близначка Мила секоја вечер се препуштаме на магијата на книгите – читаме, сонуваме и патуваме низ светови што ги создаваат приказните. Но, еден момент ме погоди: не постоеше сликовница во која Јан можеше да се препознае, да се види себеси. Тоа ме поттикна да ја создадам оваа инклузивна приказна – за да му покажам дека неговата различност е вредност, а не пречка. Сакам преку Наи да ги охрабрам и другите деца и родители да ја прифатат различноста како нешто природно, убаво и нормално. Секојдневието на Наи е како секојдневието на секое дете на негова возраст. Верувам дека секое дете заслужува да се види во светот што го чита... Во моментов приоритет ми е „Среќен како Наи“ да стигне до што е можно повеќе дечиња и домови. Да ја рашириме заедно важноста на инклузивноста, на прифаќањето. Да ја пренесеме пораката дека љубовта и убавиот збор се многу посилни и похрабри од негативниот акт – вели авторката Салџиева, која по професија е графички дизајнер, а моментално работи како маркетинг- директор.
Иако децата на авторката не биле свесни дека се подготвува книгата, нивната присутност и енергија биле дел од процесот од самиот почеток. Како мал, но значаен детаљ, низ страниците се провлекуваат нивни цртежи создадени низ годините, кои ја прават оваа книга уште попосебна и лична.
Сликовницата „Среќен како Наи“ е достапна во сите поголеми книжарници и онлајн преку www.literatura.mk.
ПР објава
