Каков ни е животот, такви ни се и елките: Три варијанти како да направите елка без неред, трошоци и губење време во китење и откитување
Новогодишната елка отсекогаш била симбол на празничниот дух и домашната топлина.
Во македонските домови таа традиционално се украсува со лампиони, светилки и шарени декорации уште на почетокот на декември. За многумина тоа е најубавиот ритуал на празниците, момент кога домот блеска, а празничната магија вистински започнува.
Но, современото темпо на живот донесе промени и во оваа традиција. Луѓето се почесто живеат сами или во мали заедници, немаат време за долги подготовки, а родителите на мали деца избегнуваат класични елки поради безбедносни причини.
Токму затоа, во последниве години се појавија креативни и практични алтернативи за новогодишно украсување, кои изгледаат прекрасно, а бараат минимално време и вложување.
Еве неколку модерни и едноставни идеи кои можете сами да ги направите:
1. Елка од сијалички
Со малку креативност и неколку светилки можете да направите вистинска празнична магија. Залепете ги сијаличките на ѕид или прозорец во форма на елка и добивате ефектна светлечка декорација за неколку минути. Ефтинo, елегантно и – без неред!
2. 3Д мини елка
Овие декоративни елки се продаваат готови, најчесто направени од поцврст материјал, со кружна форма што се шири одозгора надолу. Се поставуваат лесно, зафаќаат малку простор и изгледаат модерно – совршени за мали станови или канцеларии.
3. Елка насликана со спреј
Ако сакате нешто навистина уникатно, купете боја за стакло во спреј – зелена и црвена. Со помош на едноставен калап насликајте елка на прозорецот. За десетина минути ќе добиете ефектна празнична декорација што ќе ве радува и однадвор и одвнатре.
Без оглед на формата што ќе ја изберете, важно е празникот да го украсите со љубов и креативност. Елката не мора да биде скапа – доволно е да биде ваша, топла и полна со празничен дух.
М.С.К / Фото извор: Freepik / Pexels
