По пожарот ѝ барале 13 000 евра за нова кујна: Сама ги засукала ракавите и потрошила десет пати помалку
Една млада мајка покажа дека дури и најтешката ситуација во животот може да се претвори во нова можност. Откако пожар го оштетил нејзиниот дом и целосно ја уништил нејзината кујна, наместо да потроши мало богатство на мајстори, таа решила да ги засука ракавите и да направи сè сама - и тоа за само 1.500 фунти (1.730 евра).
Ненси Фиеро (29) од Канзас Сити беше скршена кога по гаснењето на пожарот откри дека таваните и подовите во нејзината кујна се уништени. Професионалната проценка за реновирањето беше неверојатни 12.000 фунти (13.850 евра) - сума целосно надвор од дофатот на ова семејство.
„Мојот сопруг воопшто не беше за идејата за реновирање на кујната, особено не по таа цена. Беше надвор од нашиот буџет, практично недостижно. Едно утро испив енергетски пијалок, собрав храброст и си реков - ќе пробам сама. Ги извадив сите врати од кујнските ормари и после тоа немаше враќање назад“, рече Ненси.
Од очај до идеја
Понудата на мајсторот вклучуваше сè - од поставување нов гипс и ѕидни облоги, до гранитни работни плочи, нови подови и отстранување на мирисот на чад. Но, Ненси успеа да смисли многу поевтини решенија. Сама ги обои таваните и телата, ја отстрани старата текстура од ѕидовите, постави винилни штици, постави лустер и додаде плочки што се лепат и се лупат како ѕидни облоги.
„Најтешкиот дел беше да останам мотивирана и да ја видам светлината на крајот од тунелот. Понекогаш се чувствував како да преземам премногу работа. Мојот сопруг работи со полно работно време, па можеше да помогне само за време на викендите, а мојот син често бара мое целосно внимание, а потоа не можам ништо да направам. Ментално, тоа беше најтешко“, признава таа.
Креативни заштеди
Реновирањето траеше четири месеци - почнувајќи од февруари оваа година - и Ненси успеа да најде бројни начини да заштеди. Користејќи ги своите вештини за недвижности, таа обезбеди бесплатни подови, побара попусти и остатоци од материјали од Хабитат за хуманитарна помош, користеше стари завртки и хардвер и комбинираше попусти со картички за враќање пари.
На тој начин, наместо 12.000 фунти што ги побарале мајсторите, таа потрошила само 1.480 фунти.
Секако, не било сè лесно - за време на првите неколку обиди за сечење на плочките, неколку парчиња пропаднале - но резултатот, вели Ненси, целосно го трансформирал нејзиниот дом и нејзината самодоверба.
Нов изглед за нејзиниот дом
„Ја обожавам мојата нова кујна. Сега се чувствува многу посветла и поголема. Се чувствувам како да живеам во сосема нова куќа. Најдобриот дел е што мојот син е толку горд што им кажува на сите како се вклучил.
Единственото нешто што ме спречуваше порано беше стравот - а сега жалам што не го направив тоа порано!“, рече Ненси, додавајќи порака до другите мајки:
„Ако размислувате сами да реновирате - и вие можете! Само обидете се.
РЖМ/ИС
