Утринско кафе со Давид Ганевик: Мотивацијата е мотор што нè носи кон нови хоризонти
Фотографијата за него не е само професија, туку начин на живот. Креативноста, љубовта кон уметноста и секојдневните ритуали му помагаат на Давид Ганевик, моден фотограф и видеограф, да остане инспириран и мотивиран. Во ова интервју тој открива како го започнува денот, што го исполнува со енергија и како ја гледа животната филозофија.
ЖМ: Како ви почнува денот, со кој го пиете првото утринско кафе?
-Денот ми започнува претежно околу 09:00 часот наутро. Сакам да уживам во мирот што го носи утрото.
Првото утринско кафе го пијам претежно сам. Бидејќи живеам во куќа, сончевите утрата ги поминувам во градината со опуштена и релаксирана музика или пак во дневната соба каде што уживам гледајќи разни емисии поврзани со готвење, архитектура или пак гласна музика.
ЖМ: Кои се бенефитите од кафето или од она што го консумирате сабајле –дали сте забележале некаква промена кај вас?
-Утринско кафе ми е многу битно, без него некако не се чувствувам функционален за обврските во текот на денот.Така да можам да кажам дека ми дава енергија.
ЖМ: Откријте ни како се прави кафе по ваш вкус...
- Ммхмм... Имам доста омилени видови на кафе. Рецепт за одлично кафе според мене е, тоа што е направено со љубов. Верувам дека има нешто во тој контакт на создавање нешто со љубов.
ЖМ: Што е она што ви дава дополнителна енергија освен испиената шолја кафе?
Интересно прашање! Енергијата ја добивам од сето она добро што ме опкружува.Ја впивам само добрата енергија. И денот започнува многу одлично. Не давам простор за ништо помалку освен за одлична насмевка и благодараност за она што го имам и што го живеам .А тоа е, се разбира животот.
ЖМ: Што ве мотивира?
Мотивација мислам дека е само дел од клучот кој го носиме со себе за да отвараме нови врати во живот и да уживаме во нови доживувања.
Мотивација ја добивам од позитивниот резултат од моите зацртани цели, па дури и кога нешто не оди по планот, мотивацијата е секогаш тука со поголем интензитет. Таа е моторот на секое живо битие кое го носи до нови хоризонти во животот.
А мотивација ја пронаоѓам секој миг и секаде. Уживам во успесите на секој човек, на одличниот крај на некоја приказна. Успешни луѓе кои одат вистински по својот сон.
ЖМ: Кои се вашите дневни планови и обврски?
Како некој што работи како моден фотограф и видеограф, плановите и обврските во текот на денот се исти, но секој ден е различен.
Агендата ја спремам веќе во Недела за наредните денови. И уживам во секој ден што доаѓа.Работата како фотограф и видеограф понекогаш знае да ми го одземе доста поголемиот дел од денот.Да бидам на сет за камерата и по 6 до 7 часа во текот на денот и потоа да продолжам работејќи на комјутер.Оваа професија е доста креативна,така да создавам нешто ново во мојата глава,го забележувам на лист хартија а потоа го пренесувам во фотографијата или видео.Работам на нови проекти кои ќе излезат наскоро.Тука се и социјалните мрежи,тие се дел од мојата професија и секојдневно сум активен,каде што ги споделуваам сите мои соработки,проекти и секако животот на еден фотограф.
ЖМ: Како ви завршува денот, со кој ја минувате вечерта?
Без разлика на работата и обврските, па дури и кога денот не е толку сјаен го завршувам со насмевка.
Тоа ми помага да го задржам само најубавото од тој ден. Секоја вечер ја поминавам различно.Со најблиските ,или лабаво некаде во некој локал со мојот избран круг на луѓе, мојата најдобра пријателка или другари секако вечерта е само со смеа.Овој начин на живеење на моментот не ослободува од сето она што сака да ме спречи или да ме запишаа.
ЖМ: Сакате ли да прочитате книга или да гледате филм?
Сакам и филм и книга. Но морам да признаам дека повеќе сум за филм или одлична серија.Мојата библиотека во спалната соба претежно е со трилер или крими книги,но таквите жанрови се доста малку, меѓу овие книги ќе налетате и на неколку романси и љубовни книги.
Но филмот или серијата ми се повеќе блиски до мојата професија,во нив понекогаш и наоѓам и инспирација и мотивација за нешто ново.
ЖМ: Со која убава мисла го започнувате денот... или го завршувате?
Благодаран сум на Бога за секој нов ден и за секоја нова надеж. За сето она што поминало, се радувам за сето она што доаѓа.
Вчера е историја, утре е мистерија а денес денот е подарок уживај во него. Затоа и се нарекува сегашност. Со оваа мисла го завршувам секој ден.
Ирена Ставрова
