„Линдита побегна од дома на Велигден“: Љубовната приказна на новиот градоначалник на Кичево и неговата сопруга Албанка

Добивај вести на Viber

Д-р Александар Јовановски од редовите на политичката партија ВМРО- ДПМНЕ, е новиот избран градоначалник на општина Кичево, кој во наредните 4 години ќе го води градот.

Јовановски во интервју за Женски магазин во 2021 година зборуваше за неговиот живот, семејството, професијата и сопругата Линдита.

Во јавноста привлече внимание поддршката која ја доби Јовановски од сопругата која инаку по националност е Албанка, а тие двајца се доказ дека љубовта не познавата ниту националност, раса и вера.

Линдита Лимани Јовановска е магистер и професорка по англиски јазик во О.С.У. „Дрита“. Заедно ги одгледуваат трите деца – Јана, Живко и Дафина.

Медицина – семејна традиција и животен повик

Љубовта кон медицината Јовановски ја наследил од своите родители. Мајка му била специјалист трансфузиолог и основач на Службата за трансфузиологија во Кичево, а татко му специјалист педијатар.

„Од мали нозе бев опкружен со бели мантили. Иако имав интерес и за општествени науки, особено историја, сепак медицината беше мојот природен избор,“ раскажува тој.

Како млад, Јовановски бил присутен на сите спортски терени во Кичево, а голема страст му била и музиката.

„Мечтаев да имам свој рок-бенд. Со брат ми свиревме – тој гитарист и композитор, јас пејач. Имавме еден настап на гитаријада во Кичево, иако авантурата траеше кратко.“

За него младоста била мешавина од лудост и одговорност: „Кога требаше да се лудува – лудував, но кога требаше да се биде одличен – бев одличен.“

Љубов што руши предрасуди

Љубовната приказна со неговата сопруга Линдита започнала во О.С.У. „Мирко Милески“, каде Александар предавал медицински предмети, а таа англиски јазик.

„Кога ја видов првпат, ми личеше на пеперутка. Лесно и грациозно се движеше. Беше љубов на прв поглед,“ се присетува тој.

Иако во почетокот се соочиле со предрасуди поради различната етничка припадност – тој Македонец, таа Албанка – нивната љубов ги победила сите пречки.

„Имаше отпор, но моето семејство ме поддржа. Упорноста ми е најсилната страна – верував дека љубовта ќе победи. Така и беше,“ раскажува Александар.

Одлуката на Линдита да побегне од дома на Велигден го означила почетокот на нивниот заеднички живот. Со раѓањето на првото дете, односите со нејзиното семејство се нормализирале – денес живеат во склад и почит.

„Нашето семејство е како „Македонија во мало“ – имаме различни вери и култури, но заедно ги славиме сите празници. Љубовта и почитта се најважни“.

Целото интервју може да го прочитате тука:

Се вљубив во Албанка, ни предвидуваа несреќен крај, а ние сме во брак и имаме три деца: Д-р. Александар Јовановски

*Забрането преземање авторска содржина од Женски магазин