Во Сен Тропе научив дека вистинскиот луксуз е во едноставните моменти: Катерина Спирова за Женски магазин
Таа е дел од новата генерација млади жени кои умешно го комбинираат образованието, креативноста и личниот развој. Катерина Спирова живее во Скопје, а својата кариера ја започна со работа за козметичка компанија, за потоа брзо да стане заштитно лице на клиника за естетика и соработник со бројни брендови на социјалните мрежи. Денес има и своја онлајн страница каде активно креира содржини и инспирира илјадници следбеници.
Покрај тоа, Катерина е студентка по менаџмент на човечки ресурси на меѓународно ниво, а нејзиното најголемо хоби е патувањето – со секое ново искуство и дестинација учи да го гледа животот од различни перспективи. Во ова интервју таа ни открива детали за својот стил, утринските ритуали, љубовта кон патувањата и филозофијата со која го живее секој ден.
ЖМ: Твојот стил е комбинација на елеганција и модерна свежина – кој е твојот омилен моден детаљ без кој неизлегуваш од дома?
– Секогаш носам очила за сонце и накит. Тие ми се завршен дел што го прави стајлингот целосен.
ЖМ: Дали постои „ритуал за убавина“ кој никогаш не го прескокнуваш?
– Да, никогаш не прескокнувам чистење на кожата и хидратација. Без разлика колку сум уморна или зафатена, тоа ми е задолжителен дел.
ЖМ: Како изгледа твојата секојдневна нега на кожа – имаш ли must-have производи?
– Моја рутина е едноставна: чистач, серум и крема за хидратација. Must-have ми е и SPF кремата, затоа што ја сметам за најважна за здрава и негувана кожа.
ЖМ: Ако треба да одбереш три збора со кои би го опишала твојот стил, кои би биле тие?
– Елегантен, женствен и свеж.
ЖМ: Што те инспирира повеќе: модните трендови или твоето лично чувство за убавина?
– Секогаш повеќе се водам од моето лично чувство за убавина. Сакам да комбинирам и по некој тренд, но верувам дека стилот е да останеш верен на себе и да се чувствуваш добро во тоа што го носиш.
ЖМ: Започна со козметичка компанија, а денес имаш повеќе соработки – што е највозбудливото нешто што ти ја донесе твојата работа на социјалните мрежи?
–Највозбудливо е тоа што имам можност да работам со брендови што ми се допаѓаат и да правам содржина што мене ми е интересна. Најмногу ме радува кога следбениците ми пишуваат пораки дека нешто им помогнало.
ЖМ: Како ја избираш темата или концептот за твоите содржини?
– Се водам според тоа што мене ми е интересно и корисно, но и што би сакале моите следбеници да видат.
ЖМ: Што е потешко – да бидеш креативец или да бидеш дисциплиниран во креирањето континуирана содржина?
–Мислам дека е потешко да останеш дисциплинирана. Идеи секогаш има, но предизвик е секој ден да создаваш нова содржина и да останеш редовна.
ЖМ: Колку е важно автентичното претставување на Инстаграм денес?
– Мислам дека автентичноста е најважна. Луѓето многу лесно препознаваат кога нешто е наметнато, а кога е реално. Само ако си искрен и своj, можеш да изградиш вистинска врска со следбениците.
ЖМ: Што е најчестата реакција што ја добиваш од твоите следбеници?
– Најчесто добивам пораки дека ги инспирирам со моите препораки и lifestyle содржини. Многу ми е драго кога ќе ми напишат дека нешто пробале по моја препорака и се задоволни.
ЖМ: Кажа дека патувањето ти е омилено хоби – која дестинација те освои засекогаш?
– Сен Тропе е место што ми остана во срце. Има нешто волшебно во тоа мало француско градче – мирисот на морето, тесните улички и гламурот кој се чувствува на секој чекор. Таму научив дека вистинскиот луксуз е во едноставните моменти – да уживаш во залезот со чаша шампањ и добри луѓе околу тебе.
ЖМ: Имаш ли „bucket list“ на места кои сè уште сакаш да ги посетиш?
– Да, имам! На врвот на листата ми е Мајами, ми се допаѓа енергијата, плажите и ноќниот живот. А како град што сакам да го посетам, тоа е Сингапур – интересен ми е поради современата технологија, паметните системи во градот и тоа како се живее модерно.
ЖМ: Што секогаш носиш со себе во куфер – твој „патнички трик“?
– Секогаш ставам мала козметичка торбичка со основни производи и маска за лице за пат. Носам и power bank и крема за раце – ми се спас на патување. И обавезно палто, затоа што во авионите знае да биде многу ладно.
ЖМ: Повеќе те инспирираат градовите со енергија или островите со мир?
– Мислам дека сум комбинација од двете. Градовите ме инспирираат со култура и динамика, а островите ми даваат мир и простор за да се исклучам и да се наполнам со енергија.
ЖМ: Кое патување ти го смени погледот на животот?
– Патувањето на Алпите, особено малите градчиња. Таму научив колку е важно да се живее полека, да се ужива во храната, во моментите и во луѓето околу нас. Тоа ме потсети дека убавината е во едноставните работи.
ЖМ: Како студентка по менаџмент и активна на социјалните мрежи – како успеваш да го балансираш времето?
– Балансот го постигнувам со добра организација. Секогаш си правам план за обврските и приоритетите. Научив дека не мора сè да биде совршено, туку важно е да се движиш чекор по чекор.
ЖМ: Имаш ли утрински ритуал што ти го дефинира денот?
– Да, денот ми почнува со чаша топла вода со лимон и ѓумбир и skincare рутина. Тоа ми помага да се фокусирам и да започнам денот.
ЖМ: Кој е твојот најголем мотиватор кога си под притисок?
– Секогаш се потсетувам зошто сум почнала и колку сум напреднала. Ме мотивира и поддршката што ја добивам од моето семејство и пријателите.
ЖМ: Што е твојот таен рецепт за самодоверба?
– Моја тајна е да се грижам за себе – и одвнатре и однадвор. Кога се чувствувам здрава, негувана, самодовербата доаѓа природно.
ЖМ: Ако треба да споделиш една животна филозофија со твоите следбеници, која би била?
– „Секогаш избирај да живееш според себе, а не според очекувањата на другите.“ Верувам дека само тогаш можеш вистински да бидеш среќен и исполнет.
Ирена Ставрова
