Утринско кафе со Коста Петров: Станувам во пет и работам во четири временски зони

Добивај вести на Viber

Денот најчесто ми започнува во пет часот наутро. Потребни ми се тие час, час и половина, да бидам сам и да ги средам моите мисли. Деновите ми се исполнети со многу обврски и ретко наоѓам време за себе.

Околу шест часот се будат сопругата и ќерката и започнуваат нашите дневни активности. Утрата се најчесто посветени на нашата ќерка и подготовките за училиште и се разбира, нејзиното свирење на клавир во 7 часот наутро додека цел комшилук спие . Во 08.30 веќе сме на работа.

Благословен сум со прекрасно семејство и прекрасни луѓе околу мене. Го работам тоа што го сакам и навистина се трудам да уживам во сите моменти во денот, без разлика дали тие се позитивни или можеби некогаш исполнети со нервози. Работиме на четири различни временски зони и некогаш е тешко да го исклучам мозокот и да се релаксирам но во исто време сум благодарен за животот што го живеам. 

Денот ми започнува до 5 часот наутро а веќе во 9 или 9.30 најкасно сум во кревет. Живеам пензионерски живот.

Активностите во денот најмногу зависат од тоа дали сум дома или на пат. Кога сум на пат најчесто се исполнети со многу состаноци а кога сум дома, со сите дневни активности околу водењето на нашата компанија. Само две работи ми се константни во денот. Знам дека секое утро во 8.30 ја носам ќерката на училиште а во 16.30 ја земам и ја носам на пијано. Без разлика што и да ми се случува во денот, ова се две работи за кои секогаш наоѓам време. 

Вечерта е резервирана за моето семејство и нашиот француски булдог Кире и неговото константно хрчење.
Пред месец дена го завршив мојот двонеделен маратон на „Игра на тронови“. Одбивав да ја гледам серијата неколку години и минатиот месец решив конечно да изгледам една епизода. И така една по една, две недели поминав во маратонско гледање на серијата.

* Коста Петров, основач на Пи Ворлд и автор