Викторија Бекам прв пат отворено за нарушената исхрана, понижувачки прекар и момент кога се почувствувала мала како црв
Викторија Бекам откри дека со години страдала од нарушување во исхраната, кое успешно го криела дури и од најблиското семејство - благодарение на она што таа вели дека „станала навистина добра во лажењето“.
Во долгоочекуваниот документарец на Нетфликс за Викторија Бекам, поранешната членка на Спајс Грлс отворено зборува за тоа како не ѝ се допаѓало она што го гледала во огледалото, па затоа почнала строго да ја контролира својата тежина - на „неверојатно нездрав начин“.
Модната дизајнерка, сега 51-годишната Пош Спајс, за прв пат отворено проговори за своите болни искуства со срамот поради изгледот, кои датираат од тинејџерските денови во театарското училиште. Таа никогаш дури и не им ја кажала вистината на своите родители Тони и Џеки. „Навистина почнав да се сомневам во себе и не се сакав себеси. Дозволив тоа да ме јаде и веќе не знаев што всушност гледам кога се гледав во огледало. Дали сум дебела? Дали сум слаба? Не знаев - губите секаков осет за реалност.
Бев ужасно критична кон себе. Не ми се допаѓаше она што го гледав. Поминав низ сè - од „Porky Spice“ до „skinny Posh“. Имаше сè и е тешко. Не можев да контролирам што се пишуваше за мене и какви слики беа објавени, па сакав барем нешто да задржам под моја контрола. Облеката и тежината. И ја контролирав мојата тежина на исклучително нездрав начин.
Кога имате нарушување во исхраната, станувате многу добри во лажењето. Никогаш не бев искрена за тоа со моите родители. Никогаш јавно не сум зборувала за тоа, а тоа навистина ве издвојува. „Кога постојано ви се кажува дека не сте доволно добри, тоа останува со вас до крајот на животот“, призна Викторија.
Телевизиски мерења и засрамување
Во документарецот, таа се присети и на понижувачкиот момент кога ТВ водителот во живо, Крис Еванс (шоуто TFI во петок на Канал 4) ја натера да застане на вага за да провери дали ослабела откако го родила својот најстар син Бруклин во 1999 година.
Иако во тој момент се смееше, денес признава колку тоа влијаело врз неа како млада, 25-годишна мајка:
„Ме мереа на национална телевизија. „Ајде на вага, ослабе ли?“ - се смеевме, се шегувавме, но бев многу млада. И тоа боли“, вели таа.
Критики од училишните денови
Нејзините несигурности започнаа како тинејџерка, кога се запиша во театарското училиште „Лејн“ во Епсом, образование што нејзините родители го овозможија со земање хипотека на семејниот дом. Иако работеше напорно, не беше најдобра во танцување или пеење, а изгледаше поинаку од другите девојки.
„Изгледав различно од повеќето девојки и тогаш почнаа да доаѓаат многу критики за мојот изглед и тежина“, се присети Викторија. Директорот на училиштето еднаш ѝ рекол дека на крајот од претставата „ќе биде симната од сцената од позадина“, бидејќи, како што рече, „не изгледа доволно привлечно како другите ученички“.
Нејзината мајка Џеки додава: „Тие ѝ рекоа - „премногу си дебелка, ќе бидеш одзади“. Тоа беше глупава и навредлива изјава, но сигурно ја погодила.“
Бизнис бродолом и помошта на Дејвид
Документарецот, исто така, покажува како Викторија поминала низ најтешките моменти од нејзината модна кариера. Во годините откако го лансираше својот бренд во 2008 година, бизнисот западна во длабоки финансиски проблеми, а нејзиниот сопруг Дејвид Бекам постојано мораше финансиски да ја спасува.
„Оваа работа е сè за мене, тоа сум јас. А патот беше пеколен. Речиси сè изгубив, тоа беше темно, темно време“, рече таа.
Дејвид искрено призна колку му било тешко кога неговата сопруга морала да го замоли за финансиска помош:
„Седевме и гледавме колку сум инвестирал. Дел од тој разговор ми го скрши срцето бидејќи Викторија е горда жена. Кога се запознавме, таа беше побогата од мене - ја купи нашата прва куќа. А потоа мораше да дојде и да каже „Ми требаат повеќе пари, на компанијата ѝ е потребна помош“. Беше тешко и за двајцата“, рече Бекам.
Викторија додава: „Целата моја куќа се распаѓаше. Ја губев работата, бев очајна, се срамев, но тоа беа фактите. Немав контрола, се чувствував како да тонам во жива кал.“
Од Спајс Грлс до моден дизајнер
Документарецот го следи патувањето на Викторија до Неделата на модата во Париз во септември 2024 година - нејзиниот најголем моден настан досега. Публиката ќе види како поранешната поп-ѕвезда од бендот Спајс Грлс се претвори во сопруга на фудбалер, а потоа и во успешен дизајнер.
Отворено зборува и за периодот кога Спајс Грлс престанаа да работат во 2000 година. Иако беше во брак со Дејвид и имаше бебе, таа чувствуваше голема празнина.
„Еден ден ја ширам пораката за „женска моќ“, а следниот сум сопруга, во стан во Манчестер, далеку од пријателите и семејството. Бев осамена. Имав прекрасен брак и дете, но темпото на живот одеднаш се забави. Се прашував: дали некој некогаш ќе сака повторно да ме вработи?“, се присети таа.
Пресвртна точка - Баден Баден во 2006 година
Викторија зборуваше и за Светското првенство во 2006 година и нејзиното време во германскиот град Баден-Баден, каде што таа и другите сопруги на фудбалери (меѓу нив Шерил Твиди и Колин Руни) беа во центарот на вниманието поради нивните гламурозни животи.
„Тоа беше момент на јасност за мене. Тогаш решив дека ќе го остварам мојот сон и ќе основам модна куќа. Во Баден-Баден ги „закопав“ тие силикони и се поедноставив. Си реков: ако некогаш добијам уште една шанса - нема да ја пропуштам.“
Документарецот „Викторија Бекам“ е достапен на Нетфликс од 9 октомври. На премиерата во Лондон, Викторија блескаше во елегантна бела комбинација, додека нејзиниот сопруг Дејвид и децата ја поддржуваа од првите редови.
РЖМ/ИС - ФОТО: Инстаграм
**Дознајте сè за случувањата во шоу бизнисот, бидете во тек со темите за животен стил и мода. Пријавете се во нашата Вибер група
