Тамара Тодевска со солзи зборуваше за трагедијата во Кочани: „Правдата мора да излезе на виделина“

Добивај вести на Viber

Пејачката Тамара Тодевска со тешка мака ги сокри солзите додека зборуваше за трагедијата што се случи во март во Кочани, кога во пожар во дискотека животот го загубија најмалку 62 лица, меѓу кои и нејзини блиски пријатели и колеги.

„За сите нас тоа беше огромен шок. Пред сè, тоа беа прекрасни луѓе, мои колеги и добри пријатели кои повеќе не се меѓу нас. Трагедија од незамисливи размери. Сè уште моето тело не ја прифаќа информацијата дека нив ги нема“, изјави Тамара со треперлив глас.

Таа нагласи дека, иако животот продолжува, спомените и музиката на настраданите остануваат како трајно сведоштво.
„Нивните песни остануваат. Ние сме тука да ги пееме и да се сеќаваме на сите нив. Огромна трагедија, не само за нив, туку и за сите тие млади луѓе кои го загубија животот во таа пеколна дискотека на 16 март. Сите можевме да бидеме на нивно место. Да не даде Бог никому“, рече таа.

Тодевска изрази надеж дека одговорните ќе одговараат пред законот.
„Се надевам дека правдата ќе излезе на виделина и дека сите виновни, за секој пропуст, ќе ја добијат заслужената казна“, додаде пејачката.

Покрај емотивното сведоштво, Тамара Тодевска најави и професионална новина – по многу години повторно ќе седне во жирито на популарното музичко натпреварување „Никогаш не е доцна“, каде со своето искуство ќе им даде поддршка на новите музички таленти.