Женските теми на дното од програмата: Скопје доби жена кандидат за градоначалник, но дали жените добија реален застапник?
Македонија е на прагот на револуција, во вредносна смисла. Ако до пред 20 години не беше замисливо на челните државни позиции да стојат жени, денеска ја имаме првата жена претседател, актуелната градоначалничка на Скопје како прва жена градоначалник на главниот град, жени на министерски позиции за сектори кои до неодамна беа сметани за ексклузивно машки.
И додека со голем ентузијазам народот ја прифати веста дека жените полека, но сигурно ги населуваат капиталните позиции во владеењето, во новите изборни програми на кандидатки за градоначалници, не слушнавме ниту една идеја која ќе ги донесе жените на поповолни политички или општествени функции.
Од редовите на СДСМ, до неодамна владејачка партија, денеска најголема опозициска партија, во јавноста одекна името на еден до скоро анонимус од политичка фигура - Каја Шукова. СДСМ во својата идеолошка припадност и либералистичка визура, во централното подрачје на својата идеолошка матрица ја сместува токму позицијата на жената во општеството, а потем и маргиналните групи, општествената неправда кон поединецот, една би се рекло типично индивидуалистичка атмосфера.
Оттука, правата на жените кои до вчера беа во фокусот на тогашните владини социјални политики, денеска се тотално изоставени во програмата на Каја Шулова, како кандидатка за градиначалник на град Скопје - една од најодговорните и најголемите по опсег функции на ниво на локалната власт.
Функција без суштина - штетата што им се прави на жените
Финансиска помош за мајките, подобрување на згрижувачките капацитети на градинките, подобрување на условите во основните и средните училишта се чини дека се на маргините на програмата, поддршка во вработувањето, обуки за доквалификации и преквалификации, заштита на бремените жени, прилагодување на градските превози со места за мајки со мали деца или трудници, не се приоритети во програмите дури и на жена кандидат за градоначалник.
Жените не добиваат реално застапување во инстанците на локалната власт, иако се надеваат дека женската етика и женскиот ентитет ќе донесе поголема видливост на секојдневните, граѓанските проблеми со кои се соочуваат жените.
Засега женското владеење, барем од она што можеме да го видиме во изборните програми на кадидатката за градоначалник останува само функција без суштина. Или гласање на жена, само за тоа што е жена прави многу поголем проблем, одошто услуга на жените. Не само што се покажува дека женските прашања не се важни, туку се испраќа штетна порака дека жените како гласачко тело со свои карактеристики и како интересна група немаат свој делегат во власта. Или и кога имаат делегат во власта се покажува дека не е доволно сензибилизиран за женски теми, иако како жена ги споделува истите проблеми со нив.
Дали навистина кандидатката за градоначалник е подготвена за женско лидерство?
Сето ова отвора едно суштинско прашање – дали навистина сме подготвени за женско лидерство или се задоволуваме со формата без суштина? Жените во политиката не треба да бидат само симболичен украс, туку реални носители на промени кои ќе го подобрат животот на граѓаните. Да се избере жена на висока функција не значи автоматски и победа за жените. Напротив, тоа може да биде и пораз ако таа жена не е сензибилизирана на темите кои директно ги засегаат жените, семејствата и ранливите групи.
Гласачите очекуваат од жените на власт поголема емпатија, појасна визија и политики кои ќе ја олеснат секојдневната борба со предизвиците – било да се тоа услуги во градинките, пристапен јавен превоз или поддршка за мајките и работничките. Ако ваквите теми изостанат, тогаш довербата која им е дадена не само што се изневерува, туку и се испраќа опасна порака дека „женските прашања“ се небитни.
Жените како гласачко тело не се маргина – тие се мнозинство, тие се оние кои ја одржуваат општествената ткивност. Игнорирањето на нивните потреби значи игнорирање на реалноста. Затоа, политиката на „форма без суштина“ не е само промашена стратегија, туку и директна штета за иднината на општеството.
Редакцијата на „Женски магазин“ испрати прашања до Каја Шукова во врска со статусот на женските теми и нивна прераспределба во нејзината изборна програма, но до објавување на овој коментар, не добивме никаков одговор.
РЖМ / МСК
