Француска идеја што може да ги стопли македонските улици: Нова интернет иницијатива за солидарност - да се направат „Паркови на облеката“

Добивај вести на Viber

Во време кога социјалната чувствителност станува сè поважна, една едноставна, но моќна идеја повторно оживува – „Парк на облеката“, место каде што човечноста и солидарноста се среќаваат без услови и без прашања.

Во Франција, ваквата практика е веќе позната како „шуми за облека“ — јавни простори каде што граѓаните оставаат палта, шалови и јакни за секој што има потреба. Без формулари, без надзор, без осуда. Само со едноставна порака:

„Земи ако ти треба, остави ако можеш.“

Истата идеја, пред речиси една деценија, никна и во Македонија. Жените од скопската општина Бутел тогаш организираа мала, но искрена акција со повикот:

„Ако имаш – подари. Ако немаш – земи.“

Тоа беше чин на тивка солидарност, доказ дека топлината не се мери со цената на облеката, туку со топлината на душата.

Денес, иницијаторите и поддржувачите на оваа хумана идеја веруваат дека е време таа повторно да оживее — овојпат во поширока форма, како Парк на облеката.

Предлогот е во Градскиот парк во Скопје, но и во Битола, Прилеп, Штип, Куманово, Демир Хисар, Кичево, Гевгелија, Тетово и други градови, да се создадат мали пунктови каде што секој може да остави чиста зимска облека — јакна, капут, шал, капа, ракавици, па дури и порака на охрабрување скриена во џебот на палтото.

Местата би ги одржувале волонтери – пензионери, студенти и ученици, создавајќи нова култура на грижа и хуманост. Таквите паркови би биле оази на достоинство, каде што никој не е осуден, а секој може да помогне.

Затоа што, за емпатијата не е потребна дозвола.

Доволно е едно дрво, едно палто и едно човечко срце што знае да се стопли и да стопли друг.

Ваквата иниијатива беше претставена на фејсбук фан страницата Книгохоличари.