Истанбул е град што пулсира со живот и никогаш не мирува: Сања Савеска со впечатоци од патувањето
Кога авионот слетал во Истанбул, водителката Сања Савеска веднаш почувствувала дека навлегува во сосема нова димензија. Првиот впечаток бил град што пулсира со живот – луѓе, коли, звуци и светла кои не престануваат ниту за миг. Атмосферата најмногу ја изненадила, бидејќи во еден момент гледаш древна џамија, а во следниот – модерен булевар со облакодери и бутици од светски брендови.
Истанбул, вели таа, изгледа уште поголем, побучен и повозбудлив од очекувањата. Босфорот ѝ оставил најсилен впечаток, а како вистинско откритие го открила десертот кјунефе. Турскиот чај со поглед кон мостовите и бродовите го опишува како ритуал кој те става во нов ритам на живеење.
„Истанбул е град на мостови – меѓу континенти, култури, религии и милион различни приказни. Секогаш има нешто ново да видиш и нов вкус да дегустираш. Тоа е град во кој сакаш да се враќаш,“ истакнува Савеска со која денес токму таму патуваме вирутелно.
ЖМ: Кој беше првиот впечаток кога слета во Истанбул?
– Кога авионот слета и ги видов првите делови од градот, имав чувство дека навлегувам во една сосема нова димензија. Уште на аеродромот се почувствува грандиозната страна на градот, динамиката и енергијата.
Првиот впечаток кога веќе навлегов во градот беше – огромен град, кој пулсира со живот. Сè се движи – луѓе, коли, звуци, светла. Веднаш почувствував дека ова е место кое никогаш не мирува.
ЖМ: Што те изненади најмногу – градот, луѓето или атмосферата?
– Најмногу ме изненади атмосферата. Луѓето се неверојатно гостопримливи, отворени и насмеани, но најсилно ме погоди тоа како Истанбул знае да биде и модерен и традиционален во исто време. Во еден момент гледаш древна џамија, а во следниот – модерен булевар со облакодери , ексклузивни ресторани и бутици од светски брендови.
ЖМ: Дали Истанбул изгледа онака како што си го замислуваше пред патувањето?
– Искрено, изгледаше уште поголем, побучен и повозбудлив од моите очекувања. Знаев дека е метропола, но не замислував дека ќе има толку многу енергија и динамика. Не претпоставував дека градот не спие и е раздвижено 24/7.
ЖМ: Кои места ги посети таму? Што ти остави најсилен впечаток и зошто?
- Овој пат имав поинакво искуство од вообичаеното – наместо класичните туристички знаменитости, посетував модерни хотели со панорамски поглед кон целиот град. Тоа е нов концепт кој денес сè повеќе го бараат туристите – да го доживеат Истанбул од височина, со спектакуларна глетка кон Босфорот и двата континента. Најсилен впечаток ми остави токму тој момент – градот под тебе, огромен, жив и мистичен. Неверојатни места, изградени и создадени за едно комплетно поинакво доживување на градот. Модерни хотели во кои е задржана автентичноста на традицијата и искомбинирана со модерното, хотели кои нашата публика ги препознава преку сцените од големите турски серии. Бев таму на покана на турскиот тур-оператор Картача Тур, кои навистина знаат да создадат искуство што го спојува модерното со автентичното лице на Истанбул.
ЖМ: Кој дел од градот ти се допадна најмногу?
– Босфорот. Тој дел ми изгледа како душата на Истанбул. Да седиш на брегот, со чај во рака и поглед кон мостовите и бродовите кои минуваат – тоа е доживување кое се врежува длабоко. Но, тука ќе го додадам и Таксим , место каде што современото и традиционалното се сретнуваат – додека шеташ по Истиклал и гледаш како поминува легендарниот црвен трамвај, чувствуваш дека си дел од приказната на Истанбул. Ме освои и Нишанташи , со атмосферата – спојот на луксуз, мода и урбан живот, каде што секој агол изгледа како сцена од филм. Ортакој пак е магично катче покрај Босфор – со џамијата, шарените кафулиња и вкусниот kumpir, каде што се чувствуваш како да си дел од жива разгледница.
ЖМ: Кое турско јадење ти остави најсилен впечаток?
– Турската кујна е неисцрпна, но за мене вистинско откритие беше кјунефе. Комбинацијата на сирење, шербет и крцкавост е нешто сосема поинакво од нашите десерти. Тешко е да се опише со зборови, мора да се проба.
ЖМ: Дали проба турски чај или кафе на Босфор?
– Да, и тоа е момент кој ќе го паметам. Турскиот чај во мали стаклени чаши, со поглед кон Босфор – едноставно те става во некој друг ритам на живеење. Тоа не е само пијалок, туку ритуал.
ЖМ: Како ти изгледа турската кујна во споредба со македонската?
– Турската кујна е побогата со зачини и ароми, повеќе е слоевита. Но, има една заедничка нишка со македонската – топлината и семејниот дух. И двете кујни создаваат чувство на блискост и заедништво.
ЖМ: Што си купи како сувенир од Истанбул?
– Си купив рачно изработен филџан за кафе со традиционален турски мотив. Мал, но со големо значење – секогаш ќе ме потсетува на овој град додека го пијам своето утринско турско кафе.
ЖМ: Дали доживеа некое забавно или необично искуство со локалните продавачи?
– Да! Еден продавач, кога му кажав дека сум од Македонија, веднаш ми запеа македонска песна и инсистираше да ми даде попуст. Таква спонтаност и топлина ретко се среќава.
ЖМ: Како се снаоѓаше со транспортот во еден толку голем град?
– Транспортот во Истанбул е големо искуство сам по себе. Трамваите и метрото се навистина практични, но сообраќајот е хаотичен. Сепак, ако се научиш на нивниот ритам, многу лесно се движиш низ градот. Има безброј такси коли кои се исто така поволни .
ЖМ: Дали почувствува дека Истанбул е безбеден за туристи?
– Да, се чувствував безбедно, особено во туристичките делови. Нормално, како и во секоја метропола, треба да бидеш внимателен, но генерално атмосферата е пријателска и сигурна.
ЖМ: Ако треба со една реченица да го опишеш Истанбул, која би била?
- Истанбул е град на мостови – меѓу континенти, култури, религии и милион различни приказни.
ЖМ: Дали би се вратила повторно и зошто?
– Секако! Затоа што Истанбул е град кој не можеш да го доживееш целосно за едно патување. Секогаш има нешто ново да видиш, нова улица за истражување, нов вкус за дегустација. Тоа е град во кој сакаш да се враќаш.
Ирена Ставрова
