Не можеше да ја прегрне, а таа ја роди: Емотивната исповед за мајчинството на „Девојката со крила“, родена без раце
Дејана Бачко, од Србија позната како „девојката со крила“, е едно од најинспиративните имиња во регионот. Родена без раце, таа уште од најрана возраст ја покажува силата на волјата и упорноста. Денес е академски образован сликар, параспортски шампион во паратаеквондо и активен стрелец. Но над сите професионални титули, Дејана со гордост ја носи најважната – мајка.
Во 2023 година, таа и нејзиниот партнер Марко Нежиќ станаа родители на малата Лара. Момент кој ја исполни со неизмерна радост, но донесе и предизвици што многумина не можат ни да ги замислат. Во искрена објава на Инстаграм, Дејана отвори дел од нејзината лична борба – борба која не е поврзана со спорт, туку со нешто многу поемотивно: мајчинството.
Таа ја сподели својата најголема болка од првите месеци по раѓањето на Лара – невозможноста да ја прегрне сопствената ќерка.
„Не можев да ја прегрнам и тоа беше најтешкото нешто за мене во воспитувањето на Лара, кога ќе се вратам во 2023 година. Не можев да ја прегрнам, а ја родив. Навистина го сакав тоа. Се плашев што ќе се случи со нејзиниот врат кога беше толку мала, ако се обидам да ја кренам со нозете и нешто ѝ се случи.
Секој ден беше полн со измешани емоции, но секогаш се обидував да направам што можам.
И покрај сите тие ситуации, патувавме и се обидувавме да живееме онака како што отсекогаш замислувавме и верувавме дека треба. Лара досега имаше 12 летови и посети десетина земји со нас, и некако сето тоа го направивме заедно со сопругот Марко. Секој месец ги поместував моите граници и станував послободна, а Лара беше поголема, посилна и позрела.
Денес, кога ме прегрна и бакна, бев толку трогната и се сетив на сето ова од самиот почеток.
Толку ми е мило што конечно дојде време да можеме да се прегрнеме, да можеме цврсто да се држиме. Дека можеме да правиме повеќе и повеќе заедно.“
Низ зборовите на Дејана се гледа сила, нежност и неверојатна мајчинска љубов.
Дејана и Марко не дозволиле хендикепот да ги спречи во намерата да живеат како нормално семејство.
Исповедта на Бачко не е само приказна за предизвиците на мајчинството – тоа е потсетник дека љубовта, истрајноста и вербата во себе можат да направат невозможните работи.
РЖМ
Фото: Инстаграм
