Ана Бунтеска зад најемотивниот текст за песна на Дац и Александар: „Ние само истуривме малку златна прашина на твоите стихови од злато“
Поетесата Ана Бунтеска стои зад текстот на песната „Еј гиди“, која веќе се издвојува како една од најемотивните и најискрени соработки на музичкото дуо Дац и Александар. Со силна поетска емоција и внимателно одбрани зборови, Бунтеска успеа да создаде текст што длабоко допира, а музиката на дуото му даде дополнителна магија и топлина.
За Ана, „Еј гиди“ има посебно значење и лично место во нејзиното творештво, а предизвикот при пишувањето бил токму во употребата на збор кој дотогаш не го користела. Инспирацијата и поддршката од соработниците, како и интерпретацијата на Дац и Александар, резултираа со песна што ја освојува публиката со својата искреност.
„Оваа песна ми е една од омилените што сум ги напишала. Предизвикот беше да напишам песна со збор кој дотогаш не сум го користела (Александра Танурова Тасевска сполај ти на думата)...а потоа Дац & Александар направија магија (сполај ви за честа)“, напиша Ана на Фејсбук.
По објавувањето на песната, Дац и Александар јавно ѝ се заблагодарија на поетесата за довербата и за силните стихови кои им биле инспирација.
„Ти благодариме, драга Ана. Ние само истуривме малку златна прашина на твоите стихови од злато“.
„Еј гиди“ е уште еден доказ дека кога поезијата и музиката ќе се сретнат на вистински начин, резултатот е дело што останува и се чувствува долго време.
РЖМ - Г.Д.Г
