Македонскиот рапер со убави вести за неговите фанови: Врчак подготвен за големо камбек издание

Добивај вести на Viber

По долги години музичка пауза и тивок период во кој ретко се појавуваше во јавноста, македонскиот рапер Раде Врчаковски – Врчак повторно е во полн креативен подем. Неговото враќање започна пред две години со хитот „Посреќна“ во соработка со дуото ДНК (Панчо и Андреј) – песна што веднаш ја потсети публиката на препознатливиот урбан звук на Врчак.

Овој викенд, Врчак ги израдува фановите со нова објава на социјалната мрежа Фејсбук, откривајќи дека конечно го финализира својот нов албум, кој ќе биде објавен многу скоро.

Албум посветен на љубовта – и бесплатен за сите

Во својата објава, Врчаковски откри неколку клучни детали за проектот:

„Сите велат албумот е врв! Албумот ќе биде посветен на љубов кон целиот женски род во човештвото. Ќе биде бесплатен за сите.“

Со ваков концепт, Врчак најавува емотивен, но и достапен проект, кој уште пред да излезе привлекува големо внимание.

Промоцијата одложена – следи интернационално поглавје

Поради смртта на Владимир Блажев -Панчо, со кого Врчак имал предвидено соработки, планираната декемвриска промоција на новиот македонски албум ќе биде преместена за јануари.

Во претходно интервју Врчак откри дека на овој албум ќе се најдат и две необјавени песни кои ги работел со Панчо и Андреј пред да загинат во пожарот во дикостеката во Кочани.

Но тука не завршуваат вестите. Врчак откри дека паралелно работел и на сосема друг проект – американски музички албум, снимен во легендарните PARAMOUNT Studios во Холивуд, со учество на врвни артисти од Лос Анџелес и инженер кој работел со Бруно Марс и Џејсон Деруло.

Албумот веќе располага со ISRC кодови и ќе биде издаден преку издавачка куќа поврзана со еден од најпознатите музички продуценти на планетата – Will.i.am.

По јануарската македонска промоција, ќе започнат и подготовките за неговата американска промоција.

Со два албуми – домашен и интернационален – и со амбициозни планови за настапи и промоции, Врчак дефинитивно се враќа на сцената со полна сила, а публиката едвај го чека неговиот нов музички период. 

РЖМ - Г.Д.Г