Современите музи на македонското актерство: Талентирани, наградувани, инспиративни – Сара, Тамара и Наталија имиња за кои зборува Европа

Добивај вести на Viber

Македонската актерска сцена во последниве години добива нов сјај благодарение на младата генерација на талентирани актерки кои не само што освојуваат на „штиците што живот значат“, туку се и сериозни имиња на меѓународната филмска сцена. Сара Климоска, Наталија Теодосиева и Тамара Ристоска се дел од овој моќен подмладок, кој со секоја нова улога ја зацврстуваат својата позиција како идни носители на македонската драмска уметност.

Сара Климоска – стружанка со европско признание

Драмскиот театар е нејзината матична куќа, Сара Климоска уште одамна ја потврди својата актерска зрелост и длабочина. Нејзините улоги во филмовите „Врба“ (2019), „Кајмак“ (2022), „Домаќинство за почетници“ (2023), „Лена и Владимир“ (2023) и „Збогум, Копакабано“ (2026) ѝ донесоа значајни признанија, но најголемото до сега е изборот за European Shooting Star на Берлинале 2021 – престижно признание за најперспективни млади европски актерски таленти. Сара впечатливо балансира меѓу театарот и филмот, покажувајќи зрел актерски израз и автентичност.

Тамара Ристоска – од ТВ ѕвезда до европска филмска надеж

Тамара Ристоска стана препознатливо лице преку улогата на Јана во популарната ТВ-серија „Семејството Марковски“, а ја видовме и во серијата за млади „Тин камп“. Со филмските улоги во „Мими“, „Проблемот на Тина“, „Обичната Ели“, „Return to Silent Hill“ и „Verified Target“, Ристоска покажува исклучителен спектар на актерска изведба. 

Особено е значајно нејзиното учество на Berlinale Talents 2025, каде беше единствената претставничка од регионот избрана меѓу 3.836 пријавени актери од 123 земји. Тамара работи и на нови проекти, меѓу кои се филмот „Лубарда“, „Рака на правдата“ и режисерското деби на Сара Климоска – „Нова енергија“ кој имаше премиера на овогодинашното издание на Меѓународниот филмски фестивал „Браќа Манаки“.

Наталија Теодосиева – актерка, кореографка, талент со повеќе лица

Наталија Теодосиева импресионираше во главната улога на Родна во филмот „Врба“ на Милчо Манчевски, за која освои бројни награди и признанија од светски филмски фестивали. Нејзиниот актерски пробив го направи преку филмот „Мими“.

Таа досега била дел од ансамблот на Театар Комедија, а сега е член на Македонскиот народен театар. Наталија не е само актерка – таа е и кореографка, што ја прави уникатна на домашната сцена. Исто така, е дел од престижни програми како Berlinale Talents, Sarajevo Talents и Ponta Lopud, каде се изградуваат идните европски филмски професионалци.

Талент, посветеност и визија

Сара, Тамара и Наталија се трите имиња кои се синоним за нова енергија, професионализам и автентична актерска интерпретација. Тие не се само надежта на македонската уметност – тие се нејзината сегашност. 

Преку признанија на најпрестижните европски фестивали, впечатливи улоги и постојана креативна еволуција, овие три актерки веќе го градат патот кон една поинаква, модерна и отворена македонска културна сцена.