Венеција ја очекува „Мајка“ на нашата режисерка Теона Стругар Митевска: Нуми Рапас во најмоќната улога – Мајка Тереза
Шведската актерка Нуми Рапас ќе ја толкува улогата на Маjка Тереза во филмот Mother, кој оваа година ќе ја има својата светска премиера на 82-от Филмски фестивал во Венеција, во престижната програма Horizons.
Филмот е во режија на македонската режисерка Теона Стругар Митевска, која заедно со Гоце Смиљевски и Елма Татаргиќ е автор на сценариото. Приказната се фокусира на седум клучни дена од животот на Мајка Тереза, во моментот кога решава да го напушти манастирот во Калкута и да го постави темелот на редот „Мисионерите на милосрдието“.
„Прочитав десетици нејзини писма и ја истражував нејзината мисија. Постојат и многу негативни текстови за неа, но со Теона се трудевме да ја пронајдеме нашата Мајка Тереза – жената што чекала цели седум години дозвола од Ватикан за да ја започне својата работа. Тоа е неверојатна историја на верба и упорност,“ изјави Рапас за Deadline.
Покрај Рапас, во актерската екипа играат и Силвија Хукс и Никола Ристановски. Филмот е снимен во Брисел и Калкута, а снимањето заврши кон крајот на 2024 година.
Со „Mother“, Теона Стругар Митевска уште еднаш го става македонското авторско кино на големата светска мапа, а приказната за Мајка Тереза добива ново, современо филмско читање.
РЖМ/ИС
Насловно фото: EPA/SEBASTIEN NOGIER/Фејсбук/РЖМ
