Лубеница за појадок? Зошто да не – но само ВАКА и во вистинска КОЛИЧИНА
Во летните месеци кога жештините нè обземаат уште од раното утро, многумина посегнуваат по нешто лесно и освежувачко за појадок.
Лубеницата, со својата сочност и слаткост, се чини како совршен избор. Но, нутриционистите предупредуваат – да, лубеницата може да биде дел од здрав појадок, но под одредени услови.
Според нутриционистката Тања Димитриевска, лубеницата е идеална за хидратација, богата со витамини А, Ц и антиоксиданси, но истовремено содржи природни шеќери кои, ако се внесат во поголеми количини и на празен желудник, можат да предизвикаат нагло покачување на шеќерот во крвта.
Како правилно да се консумира?
Најдобро е лубеницата да се јаде во комбинација со протеини или здрави масти, како неколку бадеми, јогурт со низок процент на маснотии или парче интегрален тост со путер од кикирики. Ваквата комбинација помага да се стабилизира нивото на шеќер и да се одржи ситост подолго време.
Препорачана порција за возрасен човек е околу 200 до 300 грама лубеница во едно седење, односно не повеќе од две чаши исечени коцки.
Иако на прв поглед изгледа лесна и диетална, прекумерната консумација на лубеница може да доведе до надуеност, дигестивни проблеми и замор – особено ако е единственото нешто што сте го внеле наутро.
