Маратонците по 18 –ти пат трчаат за Тоше: Од Нова Градишка до Крушево – патеката на љубовта и сеќавањето

Добивај вести на Viber

Пред електротехничкото и економското училиште „Нова Градишка“, вчера започна 18-тиот меморијален маратон кон родниот град на македонската музичка легенда, Тоше Проески во Крушево.

На маратонот му претходеше положување венци и палење свеќи на споменикот на трагично починатиот музичар. Овој симболичен чин уште еднаш ја потврди трајната врска помеѓу Нова Градишка и Крушево - градови кои засекогаш ги обединуваше љубовта и почитта кон уметникот кој остави неизбришлив белег во регионот.

Делегацијата на градот Нова Градишка ја предводеше заменик-градоначалничката Сабина Влаовиќ, заедно со директорката на Туристичката заедница Динка Матијевиќ, која, во име на градот, ја поздрави Македонската делегација и ги испрати маратонците на нивното повеќедневно патување од над 700 километри.

Тоше Проески, кој загина во сообраќајна несреќа на автопатот А3 во близина на селото Стари Петрови кај Нова Градишка на 16 октомври 2007 година, денес живее преку спомени, музика и љубов што ги негуваат бројни обожаватели низ целиот регион. Неговата прерана смрт остави длабока празнина, но исто така изгради мост на пријателство меѓу две земји и два града.

Овој маратон, кој се одржува во негова чест веќе 18 години, уште еднаш испрати силна порака за единство, почит и трајна благодарност до уметникот чии пораки за љубов и човечност го надживеаја времето.