Денеска го празнуваме рождеството на Пресвета Богородица - Не изнесувајте ништо од домот, жените треба строго да се придржуваат кон овие правила!
Пресвета Дева Марија се роди од своите стари родители, Јоаким и Ана. Татко ѝ беше од племето Давидово, а мајка ѝ од родот Аронов.
И така, таа по татко беше од царски, а по мајка од архијерејски род и со тоа го предобразуваше Оној Кој од неа ќе се роди, како Цар и Првосвештеник. Нејзините родители беа веќе остарени, а немаа деца. И затоа беа посрамени пред луѓето и скрушени пред Бога.
И во својата скрушеност Му се молеа на Бога со плач, да ги израдува во нивната старост и да им подари едно чедо, како што некогаш ги израдува старецот Авраам и старицата Сара подарувајќи им го синот Исак.
И семоќниот Бог Кој гледа сè ги израдува со радост што ги надминуваше сите нивни очекувања и најубави соништа. Бидејќи им подари не само ќерка туку и Божја Мајка; ги озари не само со привремена радост туку и со вечна. Бог им даде само една ќерка, која подоцна им роди само еден внук - но каква ќерка и каков внук!
Благодатната Марија, прославена меѓу жените, храм на Светиот Дух, олтар на Живиот Бог, трпеза на небесниот леб, кивот на светоста Божја, дрво со најсладок плод, слава на родот човечки, пофалба на женскиот род, источник на девственоста и чистотата - тоа беше од Бога даруваната ќерка на Јоаким и Ана.
Родена во Назарет, а по три години одведена во храмот јерусалимски, од каде што се врати подоцна пак во Назарет, за наскоро да ја чуе благовеста на Светиот Архангел Гавриил за раѓањето на Синот Божји, Спасителот на светот, од нејзиното пречисто и девствено тело.
Народни обичаи и верувања
Во традицијата на македонскиот народ, Мала Богородица се смета и за крај на летото и почеток на есента. Луѓето верувале дека тогаш започнува периодот кога се „облекува зимската облека“, односно природата полека се смирува и се подготвува за зима.
Обичај бил на овој ден да не се работи ништо тешко на нива, туку семејството да се собира околу трпезата и молитвата.
Мала Богородица е ден што особено го почитуваат девојките и жените; тие задолжително одат во црква на литургија и упатуваат молитви кон Пресвета Богородица, која се смета за заштитничка на жените и децата.
Во народот се верува дека децата што ќе се родат на Мала Богородица имаат посебна заштита и благослов од Мајката Божја.
Се верува дека на денот на раѓањето на Пресвета Богородица ништо не би требало да се дава од куќата – за „среќата да не излезе“.
Многу семејства во Македонија ја слават Мала Богородица како своја семејна слава.
Можеби ќе ве интересира
