ИМ ДАВАЛЕ ХРАНА СО ИЗМИНАТ РОК, ПСИХИЧКИ И ФИЗИЧКИ ГИ МАЛТРЕТИРАЛЕ - сопственички на Домови за стари лица се теретат 'за сурово и нечовечко понижување'
Министерството за внатрешни работи поднесе кривична пријава против две сопственички на приватни домови за стари лица во Скопје, осомничени за злоупотреба на службена положба и малтретирање на згрижените лица. Според информациите од МВР и Обвинителството, двете жени, на возраст од 47 и 58 години, добиле мерка притвор.
Истрагата утврдила дека во домовите во населбите Бутел и Центар, каде биле сместени повеќе од дозволениот број лица, биле констатирани ужасни услови и нехуман третман. Корисниците биле хранети со производи со изминат рок, дел од нив спиеле по двајца во еден кревет, а некои биле заклучувани во посебни простории.
Осомничените немале доволно стручни лица за грижа, ниту соодветна документација за вработените и корисниците. И покрај тоа, наплаќале високи износи за услуга која не ги исполнувала основните стандарди.
Од МВР потврдуваат дека во тек е детална истрага и дека домовите се затворени, а сите згрижени лица се префрлени на безбедни локации.
