Има со што да се гордееме: Македонија на врвот на позитивна листа составена од земји од регионот - по оваа услуга
Најбрз мобилен интернет во регионот има Македонија, со просечна брзина на симнување од 161,53 Mbps.
Потоа следуваат Албанија (104,11 Mbps), Косово (97,43 Mbps), Црна Гора (80,27 Mbps), па дури потоа Србија (71,70 Mbps), додека Босна и Херцеговина е на последното место со скромни 29,65 Mbps.
Иако Западен Балкан бележи напредок во дигиталната инфраструктура, Босна и Херцеговина и натаму се соочува со сериозен заостанок кога станува збор за брзината на интернетот, и мобилен и фиксен, пренесува Бизнис и финансии.
Од друга страна, кога станува збор за фиксен интернет, Србија ја држи водечката позиција со 92,21 Mbps. Следуваат Црна Гора (87,64 Mbps), Албанија (84,64 Mbps), Косово (82,24 Mbps) и Македонија (49,01 Mbps), додека БиХ повторно е на дното со само 35,71 Mbps.
Податоците се прикажани на графикон објавен од Радио Слободна Европа (РСЕ) и се однесуваат на просечните брзини на симнување (download) на интернетот по држави во регионот во јули оваа година.
Во Хрватска, која не е опфатена со анализата, просечната брзина на симнување во фиксните мрежи во 2025 година, според Speedtest, се движи меѓу 70 и 120 Mbps, додека мобилните мрежи нудат помеѓу 30 и 80 Mbps, зависно од регионот и операторот.
Во време кога брзиот и сигурен интернет станува основна алатка за образование, работа и секојдневен живот, резултатите за Босна и Херцеговина укажуваат на итна потреба за инвестиции и реформи во секторот телекомуникации.
План за раст – бесплатен интернет за земјите од Западен Балкан
Кога беше усвоен новиот План за раст за Западен Балкан со цел да се истакнат предностите од членството уште пред официјалното приклучување кон ЕУ, посебен дел се занимаваше со дигиталната поврзаност, односно интернетот.
Целта на иницијативата „Слободен Wi-Fi за Западен Балкан“ е да се овозможи бесплатен безжичен интернет на јавни места, како плоштади, паркови, библиотеки, училишта и други јавни простори во земјите од регионот.
Овозможувањето полесен пристап до интернет е особено важно во руралните и помалку развиени средини. Тоа ќе помогне во развојот на дигитални услуги како е-управа, е-образование и е-здравство, а опремувањето на туристичките локации со бесплатен интернет дополнително привлекува повеќе туристи.
EUpravo zato.rs / М.С.К
