„Најубавиот град во Европа каде што никој не оди“: Најдобра храна, ниски цени и стотици џуџиња
Кога ќе помислиме на европски градови што вреди да се посетат, во мислите најчесто ни се вртат истите имиња – Париз, Рим, Прага или Барселона.
Но, вистинското богатство на патувањето се крие токму во оние места кои не се на секоја разгледница и каде нема туристички гужви на секој чекор. Еден таков драгоцен град се наоѓа во Полска и го изненадил дури и искусниот светски патник Роберт Дачешин.
„Иако досега обиколив многу европски градови, за овој можам да кажам дека е сигурно еден од најубавите“, откри Роберт мислејќи на Вроцлав, третиот по големина град во Полска, кој често останува во сенка на попознатите дестинации.
Тој додаде дека најубавите искуства доаѓаат тогаш кога најмалку ги планираме.
„Ако сакате да патувате, претпоставувам дека имате неколку дестинации на врвот на вашата листа. Искрено, најмногу сакам кога без некој посебен план и по некои животни околности ќе завршам на место за кое не знам многу, а подоцна се испостави дека е едно од најубавите што некогаш ќе ги видите“, рече Роберт.
Вроцлав е град во кој реката се разгранува на 12 текови, формирајќи 21 остров, поврзани со повеќе од 300 мостови. Цените се пристапни, а Стариот град, со своите шарени фасади и готски градби, изгледа како сцена од бајка.
И тогаш, додека шетате, ќе забележите џуџиња – мали скулптури на секој чекор кои станаа симбол на градот.
Нивната историја има подлабоко значење. Како што објасни полскиот новинар Аркадиуш Форстер за BBC: „Џуџињата нè насмејуваа во тешки времиња, и тоа беше целата идеја – да се прикаже апсурдноста на ситуацијата и да се охрабрат луѓето да престанат да се плашат“.
Извор: Мондо (М.С.К)
