Офицерскиот дом оживеа во боите на уметноста: Вака се слави културата, магична вечер во Битола

Добивај вести на Viber

Битолчани вчеравечер уживаа во вистинско уметничко доживување пред Офицерскиот дом, каде што се одржа настанот „Битола арт мапинг“, во рамките на затворањето на 17-тото издание на Битолското културно лето – Битфест.

Овој несекојдневен проект ја претвори Битола во сцена на современа уметност, каде што публиката имаше можност да биде дел од спектакуларен 3Д мапинг, аудиовизуелни инсталации, музика и интерактивни содржини што ја доближија културата до сите генерации.

Фасадата на Офицерскиот дом блескаше во светлосни ефекти и проекции кои предизвикаа воодушевување кај бројната публика. Станува збор за настан што ја слави средбата помеѓу технологијата и уметноста, и го потврдува статусот на Битола како културен центар со отворен дух.

Со оваа завршна вечер официјално беше заокружено едно богато културно лето. Во изминатите 70-тина дена, почнувајќи од 26 јуни, Битола беше домаќин на голем број настани што ја афирмираа македонската музика, традиција, театар, класична музика и младинска креативност. Посебен акцент беше ставен и на програмите за најмладата публика.

Битфест уште еднаш покажа дека културата живее и се развива, а Битола знае како да ја негува – со страст, стил и отвореност кон новото.