Српската „принцеза на знаењето“ живее од минималец: Се надевам дека некој ќе ме вработи
Најуспешна година во нејзината кариера во квизови беше 2012 година, кога освои дури три квизови за три месеци.
Девојката по име Милица Јокановиќ е млада дипломирана правничка и шампион на бројни квизови за знаење во соседна Србија, а во моментов работи како тн трагач на познатиот српски квиз „Потера“.
Имено, таа ја изгубила работата за време на епидемијата на коронавирусот затоа што била вишок во нејзината компанија и во моментов преживува само со помошта што ја добива од бирото за вработување.
- Компанијата каде што работев само ми рече дека компанијата има проблеми и станав непотребна таму. Работата ми заврши на 30-ти јуни и од тој ден сум невработена. Преживувам со минималецот што го добивам од бирото - вели Јокановиќ за српски „Курир“.
Иако е во тешка ситуација, Милица не сака премногу да се жали и моментално бара нова работа во професијата, односно како адвокат.
- Упорно барам работа. Испратив CV на неколку места со надеж дека некој ќе ме вработи. Би сакала да најдам работа во професијата - вели таа.
Единствениот ангажман што го има во моментов е работа на трагач во квизот „Потера“, а нејзина работа е да им отежне на натпреварувачите да си ги земат дома парите што ги заработуваат. Не секогаш ѝ успева, но таа работа не е ни постојана.
- Невозможно е да се издржувате од учество во квизови. Тие се само хоби и извор на некој дополнителен приход - објаснува младата девојка за „Курир“.
Милица Јокановиќ, која во „Потера“ беше наречена „принцеза на знаењето“, со години е српска најдобра натпреварувачка во квизови, а сега е и една од најпопуларните телевизиски личности, поради што квизовите на кои настапува имаат голема публика.
Научила да чита сама кога имала само три години, прво на латински јазик.
Поради војната и бегалците, таа сменила неколку основни училишта, а средно училиште завршила во 13. белградска гимназија на Баново брдо.
