Жената што 20 години живеела сама со морето и галебите на пуст остров: Сали Сноумен вели дека ја работи професијата од соништата
Во текот на речиси две децении, Сали Сноуман живеела и работела со голема посветеност на островот Литл Брјустер, мал карпест дел од Бостонското пристаниште, опкружен со морски треви, стара бетонска градба и неколку напуштени објекти.
Под покровителство на американската Крајбрежна стража, таа ја извршувала функцијата на чувар и историчар на светилникот Бостон Лајт (Boston Light) — првиот светилник изграден во американските колонии, уште во септември 1716 година.
Со нејзиното пензионирање во 2023 година, Сноуман остана запаметена како последниот официјален чувар на светилник во САД.
Светилникот е висок 27 метри (89 стапки), бела кула чиј источен прозорец гледа кон Атлантикот и британскиот брег, оддалечен речиси 5.000 километри. Сноуман, родум од Нова Англија, потекнува од морнарско семејство со историја долга три века.
На должност секогаш е прецизна, дисциплинирана и достоинствена, но често, кога стои во просторијата со светилката, замислено гледа кон морето и размислува за оние кои пред векови патувале од Европа кон Новиот свет со дрвени трговски бродови, направени рачно од даб, јаже и катран.
„Замислете што чувствувале кога по долги денови со бури, морска болест и страв конечно го здогледале светлото,“ раскажува Сноуман. „Тогаш тој зрак значел надеж, спас, копно.“
Таа често зборува за тоа како симболиката на светлината ја надминува нејзината практична улога – тоа е светлина на човечноста, истрајноста и надежта.
Во едно августовско утро, новинар од The New Yorker ја придружувал Сноуман на патување до островот. Таа го пречекала во морнарска униформа на Крајбрежната стража, со капа, флис и карго панталони, а покрај неа биле сопругот Џеј Томпсон и нејзиниот девер, кои помагале во секојдневните обврски околу светилникот. Џеј, со насмевка, носел маица со натпис: „Keeper’s Husband“ – „Сопруг на чуварот“.
Додека пловеле меѓу островите Грејп и Слејт, далеку на хоризонтот се појавил блесокот на Бостон Лајт, кој повеќе од три века го покажува патот на морнарите кон безбедното пристаниште. Овој светилник бил изграден по итно барање на трговците од Масачусетс, загрижени од честите бродоломи и загуби на луѓе и стока во опасните плитки води околу заливот.
Кога конечно пристигнале на островот, Сноуман со насмевка предупредила: „Пазете се од галебите – тие сега владеат тука!“ На островот нема дрвја, ниту вистински патеки – само ветер, камен и морски мирис. На тревникот стои портокалов натпис „No Trespassing“, а старата дрвена куќа на чуварите, изградена во 1884 година, уште ја чува топлината на генерации кои ја чувале светлината будна. Во ходникот стои дрвена табла со натпис:
„We will leave the light on for you.“ – „Светлото ќе го оставиме да гори за тебе.“
Со оваа мисла, Сали Сноуман замина во пензија — не како обичен службеник, туку како симбол на една ера што згаснува. Нејзиниот животен мото останува едноставен: „Да ја чуваме светлината, додека има кој да ја гледа.“
Сноуман 30 години волонтирала во Поморската стража (Coast Guard Auxiliary), каде што првпат го запознала својот сопруг Томпсон. Во 2003 година била вработена како цивил од страна на Поморската стража, станувајќи првата жена и седумдесеттиот чувар на Бостонскиот светилник.
Извор / Фото извор: Wikipedia - U.S. Coast Guard photo of Snowman (2016)
