Дали е време да ги направите првите подготовки за првиот училиштен ден и како тие треба да изгледаат
Со приближувањето на септември, сѐ повеќе родители се прашуваат кога е вистинското време да започнат со подготовките за новата учебна година, особено кога станува збор за децата кои првпат ќе седнат во училишна клупа.
Стручњаците препорачуваат подготовките да започнат најдоцна две до три недели пред почетокот на школото, со цел децата постепено да се вратат во рутина и психолошки да се прилагодат на новите обврски.
Враќање во дневна рутина
Летниот распуст често ги нарушува редовните навики – децата стануваат и легнуваат подоцна, поминуваат повеќе време на електронски уреди и губат чувство за дневна структура.
Затоа, експертите советуваат постепено враќање во рутина – порано будење, редовни оброци, ограничено време на екран и воведување активности кои бараат концентрација, како читање или решавање едноставни задачи.
Посебна подготовка за првачињата
Првачињата, како деца кои првпат се соочуваат со училишниот систем, бараат поинаков, посензитивен пристап. Според психолозите, емоционалната подготовка е исто толку важна колку и практичната.
Родителите треба да им објаснат што ги очекува во училиште, да ги охрабрат дека тоа е нова и возбудлива авантура, и да ги вклучат во изборот на училишен прибор, што создава чувство на одговорност и возбуда.
Важно е да се разговара за новите пријателства, за учителката како позитивна фигура, и да се инсистира на тоа дека е во ред ако некои работи не ги знаат веднаш – сè се учи со време. Препорачливо е и заедничко читање на книги на темата „прв училишен ден“ за да се ублажи евентуалниот страв.
Подготовките за новата учебна година не се сведуваат само на купување на прибор и облека, туку се однесуваат на емоционално и ментално прилагодување.
Со внимателен пристап и трпение, родителите можат значајно да придонесат нивното дете да го започне новото поглавје со самодоверба и ентузијазам. Првачињата, особено, заслужуваат дополнителна поддршка во овој важен животен премин.
РЖМ
