Има три гроба, но никој не знае чии се: На 10 км од Скопје се наоѓа комплекс од шест цркви, прилагоден за излет, но НИКОЈ НЕ ГО ПОСЕТУВА!
Говрлевскиот манастир е македонски православен комплекс кој се наоѓа во селото Говрлево, на ридот Брзовец, источно од населеното место.
Манастирот претставува значаен духовен и културен центар, познат по својата уникатна поставеност и богата историја.
Неговата местоположба е особено специфична бидејќи во непосредна близина се наоѓа копот за вар на Цементарница „Усје“, што во 2006 година предизвика голема полемика во јавноста.
Македонската православна црква тогаш донела одлука да го продаде целиот комплекс со шесте цркви и околу 17.000 квадратни метри земјиште на претпријатието „Усје“, со план манастирот да биде преместен.
Сепак, по бурните реакции и отпорот од јавноста, продажбата била повлечена. Комплексот денес опстојува како значајно светилиште, во чии рамки се наоѓаат повеќе цркви, меѓу кои централната „Св. Трифун“, украсена со икони од мајсторот Димитар Папрадишки.
Место со голем туристички потенцијал, но никој не го посетува
Освен по еден член на Црковниот одбор во рамките на манастирот, кој престојува во местото и тоа во деновите: среда, сабота и недела од 7 до 15 часот, манастирот ретко кој го посетува. Ниту луѓе од градот или околните места, а ни мештаните не се заинтересирани да поминуваат време во манастирскиот комплекс.
Денеска во манастирот го сретнавме само Темеле, кој е член на Црковниот одобор во манастирот и кој ни раскажа дека ретко кој доаѓа. Единствено за време на големите собири, три пати во годината, кога се празнува св. Троjца, св. Петар и Павле и св. Трифун, доаѓа свештено лице и обично мештани на Говрлево, инаку манастирот е празен.
Вели дека сите пет члена на Црквниот одбор, многу вложуваат во тоа манастирот да го уредат и да го прилагодат дури и за излетнички потреби. На секоја од црквите одделно има маса за седење, место каде што се наоѓаат скоро реновирани конаци и каде исто така има место за седење, тревата постојано се коси, а местото се чисти од инсекти. Во рамките на манастирот се згрижени и неколку кучиња - чувари кои сигнализираат дека некој доаѓа, а еден член од одборот е постојано сместен во конаците и таму престојува поголем дел од денот.
-Младите не сакаат да работат и нема доброволци, вели Темеле за „Женски магазин“.
Но иако комплексот постојано се одржува и реновира од страна на доброволци, малкумина го користат излетничкиот потенцијал на местото, чија глетка кон Скопје е прекрасна. Чистиот воздух и зеленилото, пространството и духовниот мир што таму се наоѓа се непроценливи.
Како што вели и нашиот соговорник, луѓето повеќе сакаат време да поминуваат во затворени простории каде што се пуши, климатизирано е, децата немаат слобода да трчаат и на тоа да трошат пари, а тука каде што ги има сите услови за престој на деца, ретко кој доаѓа.
Три гроба во рамки на комплексот, никој не знае чии се
Во рамките на манастирскиот комеплс има три гроба, но никој не знае чии се. Главна црква е св. Трифун. Таа воедно е и најголема. Околу се лоцирани уште неколку цркви, кои се помали. Меѓу нив најмала е Црквата св. Марина, која насоро ќе биде дислоцирана во поголем објект, чија изградба е во процес.
Црква „Св. Трифун“
Црквата „Св. Трифун“ е главната манастирска црква во целиот комплекс, по кого е и наречен целиот манастир. Денешната црква се верува дека потекнува XVII век. Некои од иконите во нејзината внатрешност се дело на познатиот мајстор Димитар Папрадишки.
Црква „Св. Тројца“
Црква „Св. Тројца“ - Говрлево
Една од неколкуте манастирски мали цркви, сместена во близина на стариот конак.
Црква „Св. Петар и Павле“
Црква „Св. Петар и Павле“ - Говрлево
Една од неколкуте манастирски мали цркви, сместена на самиот раб од ридот Брзовец.
Црква „Св. Марина“ - Говрлево
Најмала од сите манастирски цркви во комплексот, сместена на средина од манастирскиот двор, но во тек е изградба на нов објект каде ќе биде дислоцирана оваа мала црквичка.
Црква „Св. Недела“
Црква „Св. Недела“ - Говрлево
Една од неколкуте манастирски мали цркви.
Црква „Св. Петка
Една од неколкуте манастирски мали цркви, сместена во близина на стариот конак.
Во рамките на црквата св. Трифун има гроб зад влезната врата, но никој не знае кому му припаѓа. Гроб има и во внатрешноста на Црквата св. „Петар и Павле“ и во самиот двор на манастирскиот комплекс, но не е познато кој почива тука.Членовите на Црковниот одобор веруваат дека тоа се луѓе кои помагале во изградба или одржување на манастирот, но тоа било пред многу години поради што никој не го одржал споменот на овие луѓе и нивниот идентитет не се зачувал.
Бегство од урбаниот хаос
Во послено време често се среќава фразата „црковен“ или „манастирски„ туризам и покрај тоа што многумина ја толкувааат оваа фраза како референца за комерцијалниот аспект на црквите и манастирите и сметаат дека треба да се избегнува употреба на ова кованица, сепак многу свештеници и претставници на МПЦ немаат проблем со неговата употреба.
Црковен или манастирски туризам не се однесува само на посетата на светите места од страна на верниците, многумина ги посетуваат црквите и манастирите, не од верски причини, туку поради нивната архитектура, историско значење и сл. а Македонија е земја во која ги има најважните фрески, иконостаси и најубавите манастири.
Овој факт може да се искористи за развој на турисчкиот потенцијал во Македонија.
М.С.К*Забрането е преземање на содржини од „Женски магазин“
