По три месеци утврдување на надлежност помеѓу Град Скопје и Општина Кисела Вода, од денеска започнува санација на патот кај „Теферич“

Патот кај „Теферич“ е затворен за користење скоро 4 месеци. Забрането е движење на моторни возила поради оштетувања на патот и свлечиште на земјата.
Одвреме-навреме се забележува движење на пешаци или велосипедисти, мештаните на општина Кислена Вода и Сопиште, регариират дека сообраќајот им е отежнат, но уште повеќе се обесхрабрени бидејќи не забележуваат дека на патот воопшто нешто се работело досега.
Патот е затворен од две страни, а пред бетонските барикади стои знак дека во тек е работа на патот. Сепак мештаните велат дека досега не забележале некој да работи на патот, ниту слушнале дека се планира негова санација.
Патот е значително оштетен бидејќи со тек на времето природата нашла начин да го надвладее асфалтот.
Голема површина од патот, особено каде пукнатините се поголеми е нараснат со висока трева, што го отежнува движењето дури и за пешаците.
Префрлање на одговорност помеѓу Град Скопје и општина Кисела Вода
Иако во непосредна близина на барикадите стои табла на која пишува дека е забрането фрлање на отпад, а како сопственик на таблата е потпишана општина Кисела Вода, со што територијално јасно е обележано дека Теферич припаѓа токму на општината, од таму во неколку наврати за порталот „Фактор“ изјавија дека, санирањето на патот не е нивна надлежност и дека наводно постои административна блокада за решение, а виновникот го посочуваат кај Град Скопје.
Со цел да ја утврдиме надлежноста на патот „Теферич“ и кај кого граѓаните да побараат одговорност што еден од капиталните патишта на Скопје е оставен на забот на времето, го побаравме Коце Трајановски, директорот на Јавното претпријатие за Државни патишта кој ни откри дека овој пат не е надлежност на ЈПДП.
-Не, не е наша надлежност, не сум сигурен дали е на град Скопје или на општината, кусо одговори Трајановски за порталот „Фактор“.
Прашање испративме и до актуелниот градоначалник во заминување на општина Кисела Вода - Орце Ѓорѓиевски.
Тој ни одговори дека од денеска ќе почнат активностите за санација на патот.
Одговор не стигна од град Скопје, тие ниту демантираа, ниту потврдија дека биле досегашна административна пречка која ја пролонгирала санацијата на патот.
На сајтот на „Уставен суд“ стои дека - општините (или град Скопје) се надлежни за работите на патиштата, одржување и управување со локалните патишта.
Одговорност за досегашното игнорирање на состојбата на патот засега нема ниту кај општината, ниту кај Град Скопје. Граѓаните во очај, не знаат каде да бараат одговори, но префрлањето на одговорноста помеѓу град Скопје и општина Кисела вода најмногу се одразува токму на нив.
Оние кои ги сретнавме и со кои разговаравме, велат дека се свесни дека на нив се гледа како на гласачко тело, а не како на граѓани кои имаат свои потреби. Градоначалникот на општина Кисела Вода во заминување го најави почетокот на санацијата на патот, но остнува непознато колку време ќе треба додека патот повторно да се пушти во употреба.
М.С.К