„Училиштата се празнат“: Годинава помал број на ученици во ученичките клупи
Според најновите податоци на Државниот завод за статистика, учебната 2024/2025 година започнува со намален број на ученици во редовните основни и средни училишта во Македонија.
Трендот на опаѓање на ученичката популација продолжува и оваа година, што повторно го отвора прашањето за последиците од намалувањето на наталитетот и иселувањето на младите семејства.
На почетокот на учебната година, во основното образование се запишани 180.627 ученици, што е за 0.8% помалку во однос на претходната учебна 2023/2024 година.
Намалувањето е забележливо речиси во сите региони, иако најизразено е во руралните средини каде што многу училишта веќе функционираат со намален број паралелки или комбинирани одделенија.
Во средното образование, трендот на опаѓање е помал, но сепак присутен. Според статистиката, оваа година се запишани 67.143 ученици во редовните средни училишта, што е намалување од 0.2% во споредба со лани.
Експертите укажуваат дека ваквите бројки се одраз на повеќегодишните демографски промени, кои бараат сериозен пристап и стратешко планирање во образовната политика – од реорганизација на училиштата, до долгорочна поддршка на младите семејства и стимулирање на наталитетот.
Иако процентите може да изгледаат минимални, тие претставуваат дел од поголема слика која алармира на потреба од прилагодување на образовниот систем кон новите демографски реалности.
Извор: Државен завод за статистика
