„Виктор беше пример за човек со визија, знаење и посветеност“: почина Доктор Исјановски
Тажна вест ја потресе денеска македонската јавност.
Ненадејно почина д-р Виктор Исјановски, истакнат македонски психијатар и поранешен директор на Здравствен дом Скопје во периодот од 2021 до 2024 година.
Роден е на 21 јули 1978 година во Скопје, каде ги завршува основното и средното образование. Медицинскиот факултет го завршува во 2003 година, а дел од студиите поминува и на Универзитетот во Мајами, Калифорнија, САД.
Својата професионална кариера ја започнува во 2004 година во Казнено-поправната установа Идризово, а од 2006 година е дел од ЈЗУ „Психијатриска болница Скопје“, каде во 2007 година ја завршува специјализацијата по психијатрија. Во 2018 година е избран за раководител во оваа институција.
Магистерските студии на Медицинскиот факултет ги завршува со просек 10, а трудот на тема „Улогата на некои ризик фактори во етиопатогенезата на шизофренијата“ го брани со највисоки оценки. Беше избран и за асистент на Катедрата по психијатрија при Психијатриската клиника во Скопје.
Д-р Исјановски зад себе остава сопруга и две деца. Неговата ненадејна смрт претставува голема загуба за медицинската заедница и за сите кои го познаваа.
Веста за неговата прерана смрт веќе се споделува на социјалните мрежи, каде голем број пријатели се збогуваат со доктор Исјановски.
Проштална порака објавија и од СДСМ, од каде изразија длабоко сочуство до неговото семејство.
- Со длабока тага и неверување ја споделуваме веста за прераната смрт на нашиот драг другар, колега и пријател, д-р Виктор Исјановски, поранешен претседател на ОО СДСМ Карпош, истакнат психијатар, професор и долгогодишен здравствен работник.
Виктор беше пример за човек со визија, знаење и посветеност. Како лекар, тој несебично се грижеше за менталното здравје на граѓаните; како лидер во здравството, со достоинство ги водеше институциите во најтешките времиња, а како партиски активист, беше глас на разумот, единството и напредокот.
Неговото заминување е ненадоместлива загуба за нашата организација, за здравствениот систем и за македонското општество во целина.
Изразуваме искрено сочувство до неговото семејство, пријателите, колегите и сите што имаа чест да го познаваат.
Почивај во мир, другар Виктор.
Твоето дело ќе живее вечно - се наведува во објавата на општинска организација на СДСМ – Карпош.
