6 болести што можете да ги наследите од вашата мајка: Генетската предиспозиција игра важна улога во еден случај

Добивај вести на Viber

Според многу научници, постојат 6 болести што можете да ги наследите од вашата мајка.

Д-р Нераџ Гандотра, психијатар и лекар во „Делфи Бихевиорал Хелт“, објаснува дека семејната историја може да открие информации за генетска предиспозиција кон одредени болести. Сепак, некои состојби имаат силна мајчина линија на пренос, објавува „Хелтшотс“.

Остеопороза
Остеопорозата е болест која најчесто се јавува кај жените по менопаузата и се карактеризира со губење на густината на коските, што ги прави кршливи. Според д-р Тод Сонтаг, специјалист по семејна медицина во „Орландо Хелт Физикал Асошиејтс“, ризикот е значително поголем ако вашата мајка исто така имала остеопороза.

Болеста често е поврзана со структурата на телото, особено кај луѓе со помала телесна маса. Луѓето кои тежат помалку од 54 килограми или имаат индекс на телесна маса помал од 22 се поподложни на оваа состојба. Ризикот дополнително се зголемува ако еден од родителите имал фрактура на колк.

Превенција: доволен внес на калциум и витамин Д, физичка активност и избегнување на фактори на ризик како што се пушењето и прекумерната консумација на алкохол.

Депресија
Депресијата, ментална болест која ги погодува милиони луѓе ширум светот, може да има и генетска основа, особено преку мајчината линија. Жените се погодени двојно почесто, а некои генетски мутации поврзани со депресија се јавуваат исклучиво кај жени.

Една форма што е директно поврзана со мајчинството е постпарталната депресија, а студија објавена во списанието „Социјална психијатрија и психијатриска епидемиологија“ укажува на присуство на специфични наследни фактори.

Рак на дојка и јајници
Жените со семејна историја на рак на дојка или јајници се изложени на поголем ризик од развој на овие болести. Генетската предиспозиција, особено мутациите на гените BRCA1 и BRCA2, често се наследуваат од мајката.

Превенција: редовни превентивни прегледи, здрави навики, избегнување пушење и алкохол и одржување здрава телесна тежина.

Дијабетес тип 2
Генските варијанти наследени од мајката може да го зголемат ризикот од развој на дијабетес тип 2 кај жените, според студија објавена во списанието Nature Genetics. Покрај генетскиот фактор, важна улога играат и исхраната, физичката активност и дебелината.

Проблеми со зачнувањето и бременоста
Проблемите со плодноста и компликациите за време на бременоста може да имаат наследна основа. Важно е да се обрне внимание на здравствената историја на мајката, бидејќи таа може да укажува на потенцијални ризици.

Д-р Памела Беренс, гинеколог на Медицинскиот факултет МекГаверн, објаснува дека жените чии мајки имаат дијабетес имаат поголема шанса да развијат гестациски дијабетес. Исто така, високиот крвен притисок и гадењето во бременоста можат да бидат наследни особини.

Кардиоваскуларни заболувања
Жените се генетски посклони кон складирање на масти во одредени делови од телото, особено во абдоминалната област. Тој модел е поврзан со зголемен ризик од срцеви заболувања и висок холестерол.

Превенција: балансирана исхрана, редовна физичка активност, избегнување на тутунски производи и контрола на телесната тежина.

Иако генетиката може значително да влијае на здравјето, важно е да се нагласи дека многу болести, дури и ако постои наследен ризик, можат успешно да се спречат или ублажат со соодветен начин на живот. Познавањето на семејната медицинска историја, редовните прегледи и грижата за сопственото здравје се клучот за навремен одговор и долгорочно зачувување на квалитетот на животот.