Празник посветен на словенските просветители св. Кирил и Методиј: „Слово е оружје, а писменоста – слобода“
На 24 мај, Македонија, заедно со повеќе словенски земји, го одбележува Денот на светите браќа Кирил и Методиј – создателите на првата словенска азбука и просветители кои ги поставија темелите на културниот и духовниот идентитет на словенските народи.
Светите браќа од Солун, родени во 9-от век, се сметаат за пионери на писменоста меѓу словенските народи. Константин (подоцна замонашен како Кирил) и Методиј, со поддршка од Византиската империја, ја создадоа глаголицата – првата словенска азбука, со цел да го преведат Светото писмо и другите богослужбени книги на разбирлив словенски јазик. Нивната мисија започнала со Моравската мисија во 863 година, каде на словенскиот народ им го донеле писмото, образованието и верата на јазик близок до нивниот.
Подоцна, нивните ученици, меѓу кои се издвојуваат Климент и Наум Охридски, ја развиле кирилицата – писмо кое денес се користи во повеќе словенски земји, вклучувајќи ја и Македонија. Охридската книжевна школа, како едно од првите универзитети во Европа, стана симбол на духовноста и просветата во регионот.
Во 1980 година, папата Јован Павле II ги прогласи Кирил и Методиј за сопокровители на Европа, признание за нивниот огромен придонес во христијанизацијата и културниот развој на Стариот континент.
Денес, 24 мај е неработен ден во Македонија и се одбележува со бројни културни манифестации, свечени академии, училишни приредби, литературни читања и одавање почит на нивното дело. Денот не е само потсетник на нивниот историски придонес, туку и симбол на вечната вредност на знаењето, јазикот и образованието.
Во време на брзи технолошки промени и глобализација, денешното чествување на Кирил и Методиј претставува потсетување дека идентитетот и културната независност започнуваат со јазикот и образованието.
