Без инструменти, но со душа: „Учи ме мајко карај ме“ со неверојатна телесна симфонија на српско дуо (ВИДЕО)
Македонската традиционална музика доби ново, несекојдневно лице благодарение на српското дуо „Алис ин ВондерБенд“, кои ја изведоа безвременската песна „Учи ме мајко карај ме“ користејќи само перкусии на тело и глас – нивната препознатлива уметничка алатка.
Дуото составено од Ана Врбашки и Марко Дињашки, го носи духот на балканската традиција низ модерна призма, спојувајќи го древното со авангардното. Изведбата на македонската песна, лишена од класични инструменти, е богата со ритам, емоција и изразност, при што секој удар од телото и секој здив ја оживуваат приказната на песната на сосема нов начин.
Основани во 1998 година на Фрушка Гора, „Алис ин ВондерБенд“ се единствени во регионот кои ја негуваат и развиваат техниката на перкусии на тело – вештина која ги комбинира музиката, театарот, танцот и акробацијата. Во своите изведби, тие не користат класични инструменти – телото е нивниот инструмент, а традицијата нивната инспирација.
Ана и Марко не се само сценски партнери, туку и животни сопатници, кои живеат во близина на Националниот парк Фрушка Гора, каде ја создаваат својата уметност во склад со природата. Тие се исто така активни во полето на едукацијата – водат музички работилници и акредитиран вебинар за примена на музика на телото во раниот развој на говорот кај деца од предучилишна возраст.
Нивниот деби албум „РикаТака, Нови Балкански Ритам“, објавен од германската издавачка куќа „CPL-Music“, ја прославува балканската музичка традиција преку акустични звуци создадени исклучиво со телото. На албумот се обработени народни песни од Србија, Хрватска, Босна, Северна Македонија, Бугарија, Грција, Турција и други земји од регионот.
Со својата изведба на „Учи ме мајко карај ме“, „Алис ин ВондерБенд“ уште еднаш покажаа дека традицијата може да звучи современо, моќно и безвременски – кога се интерпретира со страст, вештина и автентичност.
РЖМ -Г.Д.ГФото: Инстаграм
