Овации и аплауз за „Ничија земја“: Македонска претстава со триумфален настап на европски фестивал во Ќустендил
Синоќа, Македонскиот народен театар (МНТ) ја имаше честа да ја отвори првата фестивалска вечер на новиот европски фестивал „Acting Europe – Театар без граници“, кој се одржува во Ќустендил, Бугарија.
На сцената на фестивалот беше изведена претставата „Ничија земја“, по текст на Данис Тановиќ и во режија на реномираниот Александар Морфов. Претставата беше одиграна пред полна сала со околу 700 гледачи, кои ја наградија актерската екипа со стоечки овации и петминутен аплауз.
Преку моќна актерска игра и визуелна изведба, претставата успеа да ја пренесе универзалната порака за апсурдноста на војната. Иако беа обезбедени преводи на бугарски и англиски јазик, голем дел од публиката ја следеше претставата без превод, доживувајќи ја емоцијата преку актерската изведба.
Во ансамблот настапија: Сашко Коцев, Тони Михајловски, Александар Михајловски, Александар Микиќ, Борче Начев, Оливер Митковски, Софиа Насевска-Трифуновска, Гораст Цветковски, Томе Станковски, Александар Ѓорѓиески, Ненад Анѓелковиќ, Никола Стефанов, Стефан Спасов, Григор Јовановски, Кристина Гиева, Филип Миленкоски, Александар Ивановски и Марија Кондовска.
На социјалните мрежи беше објавено кусо видео од подготовките на актерската екипа пред почетокот на претставата.
Фестивалот „Acting Europe – Театар без граници“ е нова европска иницијатива насочена кон поттикнување на културна размена, интернационална соработка и уметнички дијалог преку сценската уметност. Програмата вклучува класични и современи театарски продукции од различни европски земји, како и професионални активности – работилници и обуки со претставници од Европската комисија.
Првото издание на фестивалот обединува театарски куќи од Македонија, Србија и Бугарија, а се реализира под покровителство на Европската Унија, со поддршка од Претставништвото на Европската комисија во Бугарија, општина Ќустендил и Сојузот на артисти на Бугарија.
Македонското учество е овозможено преку Министерството за локална самоуправа на Република Северна Македонија, во рамки на Програмата за прекугранична соработка со Бугарија, финансирана од Европската Унија.
